Mei Husn is hie

Neilich hobi dän Egersdörfer im Färnsähn oogschaud. Der hod wos däzähld vo aaner Rolldrebbn in Fääd, auf der mä vögln könnd. Iech habs dann ausbrobierd. Däs gehd näd.

Scho als iech miech ausdsiehn wolld, kaamä däi Leid und ham gsachd: Bou, lou däs sei, sonsd holmä däi Bolidsei. Und däim Madlä, däs ieech dabei ghabd hab, had aaner, soa junger Schnösl midäm Ring indä Nosn, gsachd: “Woas willsdnä midäm Schbinnä dou, der had nädamol a Wohnung dsum bimbän, gäi lieber dsumiä hamm.” Dou is däi däs dumme Ludä aa noch miedgangä und iech schdand bläid dou und mäi Husn hads aa no in däin Rolldrebbnrächn neidsuugn.

Am liebsd dääd iech den Egersdörfer für endgangene Lusdbarkeidnä väglaagn – und aa nou mäi Husn in Rechnung schdelln. Däi is nämlich hie.

Windä is goar ned so väkährd

Edz is däi Windä endlich vobäi. Ieech hoab joa goar nimmä dran glaabd, dassi däs nomoal erläbnä därf. Ieech wolld miech also grad freiä und dswar so richdich mid allm Drumunddran, midäm Gloas Seggd und an boar imbordierdn Erdbärn. Abä woas woar? Niesn mussdi wiä Debb, däi Augnä hoam gjuggd wiä bläid, schluggn konndi aa nimmä und allä hamsmi midleidich oogschaud und miä embfohln, indäi Abodegnä dsu gäihn und miä Heuschnubfn-Middl dsu kaufnä. Eds mussi soachn: däi Windä is billichä und nasnfreundlichä.

Sauäräi im Indänäd

Hiä hoabis scho moal gsachd: Ieech duu aa dwiddän. Ned viehl, abä immä amoal widdä. So, un damid miech maane Läid aa findnä, hoab ieech miä dachd, duusd däs amoal rechionalisiern. Waal, in däi Moncholäi, doa väschdäid miech eh kaanä. Also solldn däi Usä wissnä, woas hiä schdähd, isä Anhaamischn-Släng, ä Aboridschinäs-Schbroach. Wennsdäs dann aafnä Kardn odsäichd griegn, nochä wärns schon wissnä, naa, doa kummi näd her, däis is wäid wech, däis koanni goar ned väschdäin.

Däswechnä hoab ieech miech bei twittervision ogmeld. Doa mou mä säin Dwiddänomä, also bäi miä hald frankenfonse, un säi Basswodd (däis soach iech eich edzd amoal ned) äigebn. Bloaß kummd doa a Fehlämeldung. Ieech hoabs mindäsdns fuffdsich moal brobierd, abä däis Schäißding will ned. Woas hasd “will ned”, es will miech näd, wäil andärä sin ja drin! Woarschäins sin däis Frangngechnä, so Aldbäiän, däi uns bäi jedä Gelechnhäid undäbuddän wolln. Eds sin däi schon im Indänäd bäi Dwiddä, däi Oarschlöchä. Däs brangä iech oo, däis dsärr iech foä däi Vääindn Nadsionä. Asu gäids ned!

Ieech bin scho gans bladd

Langsam wirds ungemüdlich. Naa, ned wechä däi Käldn, bäi uns hoads minus sechzäih Groad. Sondän wechä däi Insolwänds-Meldungä, däi iech dauärnds iebä däi Frangnnjus griech. Aaane frängischä Firma noach däi andärn schäind doa bladd dsu machnä. Dou fiehldsdi doch sälbä scho gans bladd, wennsdäs liesd. Und dass edz aa däi Heide Rosenthal insolvend is, däis widerschbrichd doch däm olümbischn Gedangn, odä ned?

Haubdsach xund

Aangeblich kammä däs näiä Joahr indä Bfeifn raugn. Däis wärd niggs, soachn allä. Iech soach eich: Däis wärd alläwäil niggs, aa mid däi Ungnrufn näd. Wennsd eh schon kaa Gäld ghabd hoasd, nachä könnäs diä aa kaans wechnähmä. Wennsd eh schon in däi A-Klassn kiggsd, nochä kannsd aa nimmä groß abschdeichnä. Ieech gäi also dsuversichdlich ins näie Joahr. Haubdsach xund! Und däs wünsch ieech äich aa!

In däi Genussrechion dahamm

Däs hoabi no goar ned gwussd: Ieech bin in däi Genussrechion dahamm. Obäfrangnä is nämlich zuä Genussrechion ernannd woarn. Kurds nachdäm däi Moni Hohlmäiä, däi Dochdä vom Schdrauss, bolidisch von Obäbayän noach Obäfrangnä übäsiedld is. Däi iä Vaddä woar nämlich a Genussmänsch, also hoadsäs hald mied umdsognä, däs Genusswäsnä. Eds hoam mier dän Genuss bäi uns dahamm un müssn schaun, wäi mä damid zurechd kummä. Ieech füä mäin Deil mach hald einfach asu weidä wiä bishä.

Undäfrangnä: Wäin un Sägdn

Normaal dengdmä ja bäi Undäfrangnä an Silvanä odä Müllä-Duuhrgau. Däs is aa ned väkährd. Abä ned alaa. Doa gibds aa Domina odä Rodling – un Widdeg. Widdeg, woas maandärn edz? Joa, däs is a Sägdngründerin. Däi Dschäffin vom Uniwärsälln Lähm. Däi Fraa Widdeg is abä kaa Äindslfall in därä Gechend. Doa laafns dsu dausändn rum un fasln von Dsäidnwändä, kabsln si ab un esodärisiern rum. Ieech bin ja ehä Middl- odä Fasd-Obäfrangä, also vägläichswäis nüchdärn. Ieech kann doa ned mid un forder däi Sägdnbeaufdroachdn aaf, schleunigsd naa Würdsburch un Umgäbung aafdsubrechnä un ihräs Amdes zu walden. dou braud si woas dsamm. Kadolisch is däs ned!

Schmiä diä däi Ebochn doch wo hie

Heid mou iech moal aan Düssldorfä in däi Bfannä haun. Däi Handlsbladdrädagdä Gnüwä had än Gommenda dsu däm schräglichn Därroranschloch in Bombäih väfassd und “Ein trauriger Tag, ein epochaler Tag” drübä gschriem. Wäi? Ein epochaler Tag? Oofang vo aam dausändjährichm Räich, odä woas? Wadds doch amol ab, du Schwachiebeäschrifdlä, obs wirgli a näie Ebochn wädd, obs wirgli dausend Joar dauäd. Dou had si scho amoal aaner verschädsd. Also dou langsam. Übä Epochen endschäid mä liebä hindähär.

Ieech bin bei Dwiddä

Ieech bin edz aa dabei. Bei Dwiddä. Verschdäidä? Bei Dwiddä! Däs is däs, wod näd mäh als 140 Dsäichnä dibbn derfsd, sonsd wärds ned gsänded. Dou mussd nomal nachdengnä, obdä däi Gschmarri ned aweng verdichdn kannsd. Verdichdn, nä! Däs kommd, für däi Biesalosä undä eich, von Dichdä. Däis is a Wasserhoh däi ned drobfd. Aaaner, der drobfd, isa Undichdä! Achso: Iä müssd miä edz followän. Däs kenndä do: Twitterfonse

Ieech kaaf däi Fäns

Aachendlich habi midm Fussball ned viel am Hud. Aa ned mid däi frängischn Glubbs. Abä ieech hab a Herds füä Välierä, schliesli binni aus Frangnä un däswägn a gebörnä Välierä. Un däi wahrn Välierä sin bei uns däi Fäns. In Baareud zum Bläischdifd biedn däi sich edz im Indernäd bei Iebäi oo. Dolle Fäns dsu väschdeichärn. Do biedi mid. Ieech kennäd a boar Fäns braugnä. Wobäi, ieech was näd, obbi ned liebä däi Glubbfäns nähmä solld. Däi sin dswar noned gans sowäid wäi däi Baareudä, abä aa irchendwäi häimadlos. Ieech bied amol dausend Euro. Däi Diel is dann dä: Ieech hogg mi irchendwo hie, aafn Haubdmargd in Nermbärch, aaf däi Fäddä Fräiheid odä aafn Erlangä Huchenoddnblads un beschimbf do däi Weld – un ihr Fäns feuärd miech oo. Is däs was? Nochä schloochd äi!