Aachendlich habi midm Fussball ned viel am Hud. Aa ned mid däi frängischn Glubbs. Abä ieech hab a Herds füä Välierä, schliesli binni aus Frangnä un däswägn a gebörnä Välierä. Un däi wahrn Välierä sin bei uns däi Fäns. In Baareud zum Bläischdifd biedn däi sich edz im Indernäd bei Iebäi oo. Dolle Fäns dsu väschdeichärn. Do biedi mid. Ieech kennäd a boar Fäns braugnä. Wobäi, ieech was näd, obbi ned liebä däi Glubbfäns nähmä solld. Däi sin dswar noned gans sowäid wäi däi Baareudä, abä aa irchendwäi häimadlos. Ieech bied amol dausend Euro. Däi Diel is dann dä: Ieech hogg mi irchendwo hie, aafn Haubdmargd in Nermbärch, aaf däi Fäddä Fräiheid odä aafn Erlangä Huchenoddnblads un beschimbf do däi Weld – un ihr Fäns feuärd miech oo. Is däs was? Nochä schloochd äi!
Däi ham kaan Gschmagg
Also ieech, habi däs scho mal gsachd?, also ieech, ieech wohn ja aafm Land. Wobei, bei „Land“ had manchaans falsche Assodsiadsionä. Da isses middä Ruh ned wäid her und däi Lufd is aa mid Diesl un Gemigaliän vollgebumbd. Aaf däi Wiesnä bflandsns bläide Bedonggwadä hie un kaane Rübn odä Bodaggn mäh. Un was däs Schlimmsdä is, däi ham übähaabds kaan Gschmagg. Däi lassn sich dän gansn hässlichn Schäiß andrähä, dän sonsd gaanä möchd. Und wennsdäs draaf ooschbriggsd, dann sachns: „Wäiso, däs siechd doch schäi un billich wars aa!“
Däi Liehmäns
Grad hadmär aaner gsachd, däi Liehmän Brassers, däi san aus Frangnä. Do isses miä glei wiä Schubbn vondi Aagn gfalln, däs is der Mardin un dä Brunno, Däi ham im Nachbadorf gwohnd. Dännä habi scho innä Schul mol zwandsig Märglä gliehn un ned wiedägriechd. Edtz habi a schlechds Gwissnä. Wennis saanerdseid verflaschd hädd un solang gschüddld bis märs däs Geld widdägebn häddn, dann häddns vielleichds kaa Bang aafmachn kännä. Also bin iech schuld.
Leude, es dud miä leid! Soll nimmä vorkummä! Verschbrochn!
Däi CSU kann miech wo leggnä
Langsam langds! Nua wäil dä Glubb in däi dridde Liga dendierd, maanä däi blädn Obäbäiän, säi känndn uns in däi Loosäeggn drängä un füä an jädn Schäiß väandwordlich machnä. Bloß wäil däi Bäggschdaa a Frangä is, issä doch näd füä a jedä Niedäloch zuschdändig. Däi wähl iech nimmä, däi CSU. Däi kännä miech am Orsch leggnä!
Däi Bangnä machn bladd
Ey, iä do drausnä! Iech hab grad mein Sparschdrumbf gfüdderd. Iech sach ned, wo dä iss. Nochä glauds miä noch aaner. Abä aans sach iech eich: des mid dei Lehmänn-Brassärs, däs waä nuä dä Anfang. Däi Bangnä sin am End. Däi machns nimmä lang. Also aweng a Geld dsuä Seidn schaffnä, is beschdimmd ned fäkährd. Aabä ned das aanä nachä kummd un dän Dsinsausfall vo miä eindreibnä will. Iech hab nix gsachd, nuä gmaand habi was.
Friegs aafdä Kärwa
In däm Därflä, woi wohn, do is grad Kärwa. Des hassd, do wird no mär gsuffnä un no mär Gschmarri abgsonderd. Un a Audosguudä is aa do. Also nigs, wofüä ieech maan Bürroschduhl verlassn müssd.
Des aanzigsde sin däi Leid, däisd däs gonse Joar ned siggsd. So Grensdebile midäm durschdigen Dagglbligg, däi wi oodsochnä Ährbägs aussähnä un läichd noch Indsäsd riechnä. Däi därfn bloß dsur Kärwa naus, sonsd werns wechgschberrd. Also moi doch hie. Friegs gucknä!
Däs kann nuä dä Glubb
Aweng bin ieech aa a Glubbfän. Aabä bloß aweng. Waali hald do aufgwachsnä bin. Ned waal des a gudä Veräin is odä waal däi an gäbflechdn Ball spieln. Wos abä edz wiedä bam Glubb abgäid, däs machd miech bald wiedä zuäm Fän. Aso an falschn Dränä zuä falschn Dsäid am falschn Ord in äi falschn Licha mid däi falschn Spielä nauszuschmeissnä, sowas gibds bloß in Närmberch. Un edz nähmäs dän Godränä, däi had sogor an Breis gwunnä, für Märchnerzähln odä sowas. Däs kann alläs bloß däi Glubb, däs kann euä Veräin ned.
Däi Bauli bloggd aa aweng
Däi Schloochzeiln do obnä is ned gans richdi, wäi däi maasden Schloochzeiln aa. Bloggn kammä däs nämli ned nennä, was däi Bauli do machd. Abä hald sowos in däi Ard.
Wäshab ieech übähabds aaf däi iehrä Webseidn äigäih is folchändäs: Däi hassd do immä Dr. Gabriele M. Pauli. Hod däi edt an Dr. M. ghäirod? Odä wächsäld däi iehrä Nomä so ofd wäi iehrä Glammoddn. Näili hieß sä no Bauli-Balläis, nachäm Ärlangnä Obäbürchämasdä.
Wos miech aa aweng gwundärd hod, wor däi Ährung zuä Aldlandrädin. Wänn däi scho so ald is, warum gähdsä dann ned ind Rendn. Bloß däi griechdsä ned. Wär iehä worschänds liebä gwesn als däi Diddl.
Gwundärd hod miech aa, dos däi zwor gochd un radld, abä no kaa Brogramm hod, wosse machnä will, wennsä aanä wähld. Naja, kommd vielläichd no.
Däs Fahnägschmarri
Habder aachendlich scho däs Fahnägschmarri miedgriechd, däs edtz voa alläm in Närmberch abgäid? Also, ieech waas näd. Miä iss däs scho aweng echol, wos doa rumfladderd. Iech maan, waaß-blau, waaß-road oder waaß-iech-ned, wos solls denn? Wenn däi Härrmoo maand, däs hilfd saam Schbedsi Beggstaa, dann sollä däs maanä. Iech glaab, kaaner wähld wechä a bayrischä Fahnä däi CSU. Aasädäm häddns dann a schwoarzä Fahnä aafhängä müssn.
